Azərbaycanda “soyuq zəncir” sistemi avadanlıqlarının inventarlaşdırılmasına dair təlimlərin keçirilməsi.
Avropa İttifaqının maliyyə dəstəyi və Ümumdünya Səhiyyə Təşkilatının texniki dəstəyi ilə ölkədə soyuq zəncir sistemi avadanlığının bütün səviyyələrində – İnnovasiya və Təchizat Mərkəzi, şəhər/rayon GEM-nin anbarları və peyvənd məntəqələrində inventarlaşdırma prosesinə başlanmışdır.
Bu fəaliyyət Ümumdünya Səhiyyə Təşkilatının COVID-19 əleyhinə Vaksinasiyaya dəstək Layihəsi çərçivəsində Səhiyyə Nazirliyinin Respublika Gigiyena və Epidemiologiya Mərkəzi ilə birgə həyata keçirilir. İnventarlaşdırma prosesinin həyata keçirilməsi üçün Ümumdünya Səhiyyə Təşkilatının onlayn aləti (metodu) proqramından istifadə olunur.
2022-ci ilin 30 may-3 iyun tarixlərində Ümumdünya Səhiyyə Təşkilatının dəstəyi ilə Respublika Gigiyena və Epidemiologiya Mərkəzinin bazasında yerli təlimçilərin hazırlanması üçün “soyuq zəncir” sistemi avadanlığının inventarlaşdırılması qaydaları üzrə təlimlər keçirilmişdir.
2022-ci ilin iyun ayından başlayaraq 10 nəfər təlimçimiz tərəfindən şəhər/rayon Gigiyena və Epidemiologiya Mərkəzlərinin immunizasiya üzrə mütəxəssisləri üçün 2 günlük təlimlər keçirilir.
Həm COVID-19, həm də uşaq peyvəndlərinin saxlanılması üçün soyuq zəncir sisteminin gücləndirilməsi, peyvəndləmə ilə bağlı bütün məlumatların qeydiyyatı və təhlilinin rəqəmsallaşdarılması böyük əhəmiyyət kəsb edir. Peyvənd materiallarının təhlükəsiz şəraitdə saxlanması və daşınmasının təmin edilməsi məqsədilə Ümumdünya Səhiyyə Təşkilatının yeni alətinin (metodunun) köməyi ilə soyuq zəncir avadanlığının vəziyyəti və ehtiyaclarını müəyyən etmək, boşluqların doldurulması üçün büdcə tərtib etmək, həmçinin gələcək bir neçə il üçün planlaşdırma və təhlil aparmaq mümkün olacaq.