Səhiyyə Nazirliyi Respublika Gigiyena və Epidemiologiya Mərkəzinin mütəxəssisləri tərəfindən mayın 13-də Mingəçevir şəhərində Mərkəzi-Aran Regional Təhsil  İdarəsinin tabeliyində olan  Mingəçevir şəhəri, Göyçay, Ucar, Yevlax, Ağdaş, Zərdab, Kürdəmir rayonlarının ümumtəhsil  orta və məktəbəqədər təhsil  müəssisələrinin rəhbər, tibb işçiləri və pediatrların iştirakı ilə maarifləndirici tədbir keçirilib.

Tədbirdə uşaq və yeniyetmələrin sağlamlığının qorunması dövlətin sosial yönümlü siyasətinin prioritet istiqamətlərindən biri olduğu, bu baxımdan gələcəyimiz olan uşaqların sağlam, təhsilli, ölkəmizə layiqli vətəndaş kimi yetişməsi üçün təhsil ocaqlarının qarşısında duran əsas vəzifələri, sanitariya norma və qaydalarına, gigiyena normativlərinə əməl olunması barədə təqdimatlar nümayiş edilib.

Eyni zamanda, sağlam həyat tərzi, fəal istirahət, uşaq və yeniyetmələr arasında tütünçəkmənin zərərləri barədə təbliğat işləri aparılıb, tədbir iştirakçılarına müxtəlif mövzularda təbliğat materialları təqdim edilib.