12 Noyabr – Azərbaycan Respublikasının Konstitusiya Günü müstəqil dövlətçiliyimizin hüquqi əsaslarının formalaşmasını, insan hüquq və azadlıqlarının ali dəyər kimi təsbit olunmasını əks etdirən mühüm tarixi gündür. Bu tarix müstəqil Azərbaycanın ilk Konstitusiyasının qəbul edilməsi və ölkədə hüquqi dövlət quruculuğunun təməl prinsiplərinin müəyyənləşdirilməsi ilə əlamətdardır.

1991-ci ildə dövlət müstəqilliyinin bərpasından sonra Azərbaycanın yeni konstitusion əsaslarının yaradılması dövlət quruculuğu prosesinin prioritet istiqamətlərindən birinə çevrilmişdir. Bu məqsədlə 1994-cü ildə Ümummilli Lider Heydər Əliyevin sədrliyi ilə Konstitusiya komissiyası yaradılmış, Əsas Qanunun layihəsi hazırlanaraq ümumxalq müzakirəsinə təqdim edilmişdir.

1995-ci il noyabrın 12-də keçirilən ümumxalq referendumu nəticəsində Azərbaycan Respublikasının müstəqillik tarixində ilk Konstitusiyası qəbul edilmişdir. Bununla da ölkənin hüquqi və siyasi sisteminin formalaşdırılması, dövlət hakimiyyətinin təşkili, eləcə də insan və vətəndaş hüquq və azadlıqlarının təmin edilməsi üçün möhkəm hüquqi baza yaradılmışdır.

1996-cı il fevralın 6-da Ümummilli Lider Heydər Əliyevin imzaladığı sərəncamla 12 noyabr Azərbaycan Respublikasında Konstitusiya Günü elan edilmişdir.

Azərbaycan Respublikasının Konstitusiyası dövlət müstəqilliyinin hüquqi təminatı olmaqla yanaşı, qanunun aliliyinin, insan hüquq və azadlıqlarının müdafiəsinin, demokratik prinsiplərin və hüquqi dövlət quruculuğunun əsasını təşkil edir. Əsas Qanunda təsbit olunmuş müddəalar dövlət orqanlarının fəaliyyətinin hüquqi çərçivəsini müəyyənləşdirir, cəmiyyətin və dövlətin inkişafı üçün mühüm istiqamətləri müəyyən edir.

Konstitusiya Günü yalnız tarixi hadisənin qeyd olunduğu tarix deyil, həm də hüquqi dövlətçilik ənənələrinə, milli həmrəyliyə və konstitusion dəyərlərə ehtiramın ifadəsidir. Bu əlamətdar gün dövlət müstəqilliyinin möhkəmləndirilməsində, hüquqi prinsiplərin qorunmasında və cəmiyyətin inkişafında Konstitusiyanın müstəsna rolunu bir daha ön plana çıxarır.