Yoluxucu xəstəliklərin xarici ölkələrdən respublika ərazisinə gətirilməsinin qarşısını almaq üçün onların vaxtında aşkar edilib aidiyyəti tədbirlərin görülməsi vacib məsələlərdən biridir.

Bunun üçün dövlət sərhəd-buraxılış məntəqələrində fəaliyyət göstərən gömrük və sərhəd xidməti əməkdaşlarının bir sıra yoluxucu xəstəliklərə görə vaxtaşırı maarifləndirilməsi məqsədə uyğundur.

Bu məqsədlə Azərbaycan Respublikası Səhiyyə Nazirliyinin qurumu olan “Respublika Sanitariya-Karantin Mərkəzi”  PHŞ-nin əməkdaşları Dövlət Gömrük Komitəsi Tibb Xidməti İdarəsi Sanitariya-Karantin Xidmətinin əməkdaşları ilə birlikdə 18.07.2022-ci il tarixdən 31.07.2022-ci  il tarixə qədər olan müddətdə ayrı-ayrılıqda hər bir sərhəd-keçid məntəqəsində (“Qırmızı körpü” GSBM, “Mazımqara” GSBM, “Samur” GSBM, “Xanoba” GSBM, “Astara” GSBM, Biləsuvar”GSBM, Bakı Beynəlxalq Dəniz  Ticarəti  Limanı, Heydər  Əliyev  Beynəlxalq  Hava  Limanı) bir sıra yoluxucu xəstəliklərin (Vəba, Taun, Sarı qızdırma, Ebola, Meymunçiçəyi, COVİD-19) klinik əlamətləri, yoluxma  yolları, qorunma yolları və profilaktik eksepidemik tədbirlər barədə geniş həcmdə maarifləndirmə təlimləri həyata keçirildi.

Dövlət sərhəd-buraxılış məntəqələrində həyata  keçirilən bu təlimlərdə GSBM-lərdə fəaliyyət göstərən bütün xidmət və nəzarət orqanlarının əməkdaşları iştirak etmişdir. Yoluxucu xəstəliklərə dair verilən suallar əməkdaşlarımız tərəfindən ətraflı cavablandırılmışdır.